愛秩序灣官立小學校長崔家祥繼續傳授面試秘技，今次總結了11個超實用升中面試貼士，熟讀兼做足準備，助你面試表現穩如泰山！
貼士一、準備介紹一本好書
學生攞左閱讀獎，但叫佢介紹一本書又答唔出。既然你有攞獎，應該好好準備去介紹一本好書，切勿書到用時方恨少。
貼士二、留意最hit時事新聞
「個人強弱項？」「近日最觸動你的時事新聞？」「對AI學習的看法？」唉…….Dead air咗。就算未體驗過，明知咁hit，點都要去睇相關新聞。
貼士三、切勿背書，多分享己見
「人工智能可能改變很多工作，你覺得哪些職業會被取代？哪些職業會更重要？」「如果你是校園環保大使，你會提出哪些方法來減少浪費？」「功課、考試和活動很多，你會如何減輕壓力？」老師會追問、轉問。大家不要只背資料，要多啲自己睇法，好多時答案沒有絕對的，你的想法、見解、社會觸覺、生活經驗才是老師最想知道的，因為可以反映你的觀察力、分析力、創造力等等的關鍵能力。
貼士四、宜穿整齊校服面試
唔穿校服，穿隆重的禮服去面試。一般學校都建議同學仔穿返自己小學的整齊校服去面試，表示尊重面試，也讓老師第一眼有個良好的印象。當你選擇穿著其他服飾去面試，應該有一個強烈的理由，如你已入選港隊，或者想突顯你的專長等等。
貼士五、事前自拍30秒自我介紹
點樣知道自己已經準備好去面試？親子教育專家獨門心得：做足準備功課，事先電話自拍30秒自我介紹。
貼士六、打造一套令自己放鬆的肢體方程式
面試時，手手腳腳應該如何擺放？因人而異。有時候適當嘅肢體語言可以幫助學生緩解緊張／分散注意力（尤其係自我介紹講故事／解釋抽象概念等），動作演繹可以幫作學生專注於自己嘅敘事（當然都要間中望吓面試官），減輕其他心理壓力，有助表達自如。相反如果成舊木坐喺度，雙手緊貼大髀，可以係俾緊自己壓力，把口都容易僵硬。人類面對面表達往往係口頭同肢體並用、相輔相成（發文字訊息用emoji都係類似道理）。大家不妨留意平時與朋友放鬆交流時有無下意識「郁手郁腳」，嘗試打造自己舒服嘅一套肢體方程式，應用係面試場景度。唔使怕醜，面試官看在眼裏，都係態度分。
貼士七、想像6年後的自己反映個人憧憬
如何突出自己？不妨靈魂拷問自己，想像六年後是怎樣的自己。一方面表示自己的志向，也反映你想在這間中學得到怎樣的發展，包括學術、終身興趣、生涯規劃等，更可以表示畢業後，在社會、在國家、在國際舞台上如何作出貢獻，亦不忘記如何回饋母校。
貼士八、從答題表現對生活的觀察力
「如果你有多啦A夢的法寶袋，你會要甚麼法寶，為甚麼？」「要你發明一樣工具，你會發明甚麼？為甚麼？」因此可見，老師很愛問為甚麼。從你的答案中可以見到你對生活的觀察力。如社區內有很多老人家，你可以發明神奇交通燈，可以為長者爭取較多時間過馬路，因為他們行動會較緩慢。如果你對人工智能有少許認識，可以再加埋交通燈如何辨別長者與其他人。如果你有做過相近的原型創作，正正可以發揮你的小宇宙。另一方面，你也可以透過答案展示你的強項或終身興趣。遇上這類問題，就是你大展身手的好機會。
貼士九、以3個重點回答選校原因
「你為甚麼會揀我地學校？」最簡單但又最靈魂拷問的題目，要睇下你對這間中學的瞭解有多深。老師想知道你對學校嘅瞭解、你嘅動機同埋你同學校嘅配合度。不妨試下用這三句去答——第一句總結原因：直接講最主要嘅原因，例如學校嘅教學質素、學科強項、校風或興趣發展機會；第二句列出具體例子或證據：引用學校嘅活動、特色課程、師資、比賽成績或校友等，顯示你做過功課，唔係隨便答；第三句連結你自己強項：講你有咩興趣或長處，點樣可以喺呢間學校發展到最好，並表達你會努力為學校帶來正面貢獻。千萬不要講「近屋企／方便」、「好靚／好有名」。
貼士十、要有自信，勇於嘗試
例如英語的Read aloud，遇上生詞，仍要有自信地表達，高聲朗讀；同樣，普通話題，不要囿於音準，要勇於嘗試。學生自己準備面試文件及材料，作系統整理，面試時如有需要搜尋資料文件給面試老師，也會比較方便。注意儀容，盡量樸素。除非身體不適，否則不適宜戴口罩。
貼士十一、做足功課瞭解面試學校
「你覺得我哋學校點解要取錄你？」「你有甚麼特質配合我哋學校？」「你係點樣認識我哋學校？」「你喜歡我哋學校甚麼？」面試重點不單是認識你，還會睇下你認識學校有幾多，一定要做足功課呀！認真上網認識面試學校，瞭解學校的特色和發展方向，並尋找適合自己發展的項目，成為自己首選面試學校的原因。
撰文及文章授權：愛秩序灣官立小學校長崔家祥 ／ 面試圖片由AI生成
